“S’janë si gjyshi me nipin”, ja çfarë thoshte Kurti për raportet me SHBA-të – Blinken e tha krejt të kundërtën

“Nuk kemi ne kështu raporte me Shtetet e Bashkuara të Amerikës siç i përshkruani ju sikurse gjyshi me nipin.”. Kështu i përgjigjej kryeministri Albin Kurti akuzave të partive opozitare për prishje të raporteve të Kosovës me Shtetet e Bashkuara të Amerikës.

Mirëpo, në një reagim të Sekretarit Amerikan të Shtetit Anthony Blinken është nënvizuar fuqishëm se veprimet e së premtes të policisë së Kosovës në komunat veriore do të kenë pasoja në marrëdhëniet bilaterale midis Kosovës dhe SHBA-ve, përderisa kryeministri Kurti është shprehur të shtunën se nuk ka pasur opsion tjetër.

“A do ta dëgjoni Amerikën a po prishemi me Amerikën a po kupton. Nuk ndodhin këto gjëra, e kuptoni nuk kemi ne kështu raporte me Shtetet e Bashkuara të Amerikës siç i përshkruani ju sikurse gjyshi me nipin. Unë nuk e di kush po jua lexon sepse s’besoj që po i lexoni vetë e po mendoni kështu”, deklaronte kryeministri Kurti në nëntor të vitit 2022.

Për më tepër, kryeministri Kurti atë kohë deklaronte se asnjë veprim i Qeverisë nuk e ka befasuar ndonjë zyrtar amerikan ose evropian, teksa thoshte se përshkrimi i tillë i raporteve me SHBA-të, është ofendim për këta të fundit.

“Edhe një herë asnjë veprim i joni nuk e ka befasuar asnjë zyrtar amerikan, asnjë zyrtar evropian. Na jena në kontakt të vazhdueshëm me ta. Shtetet e Bashkuara të Amerikës, i kemi miq dhe partnerë, pra miqtë dhe partnerët nuk shkruajnë asi komunikatash çfarë i cituat ju, pra nuk ekziston raporti i tillë i ynë për besë kjo mënyrë është edhe ofendim për Shtetet e Bashkuara të Amerikës”, thoshte Kurti.

Por, reagimi i së premtes i Blinken e thotë krejtësisht të kundërten e këtij deklarimi të Kurtit, së paku në dy dimensione. Të parin se marrëdhëniet me SHBA-të nuk mund të dëmtohen dhe të dytën se veprimet e qeverisë së Kosovës nuk e kanë befasuar asnjë zyrtar amerikan.

Kjo sepse në reagimin e Blinken, ajo që nënvizohet fillimisht pasi dënohen veprimet e Qeverisë në veri ka të bëjë me faktin se është përmendur që veprimet siç shprehet Blinken janë ndërmarrë kundër këshillave të Shteteve të Bashkuara të Amerikës dhe partnerëve evropianë të Kosovës.

“Shtetet e Bashkuara të Amerikës dënojnë ashpër veprimet e Qeverisë së Kosovës për të hyrë me forcë në ndërtesat komunale në veri të Kosovës, veprime që ajo ndërmori kundër këshillave të Shteteve të Bashkuara dhe partnerëve evropiane të Kosovës.”, thotë Blinken në fjalën e tij publike.

Përveç kësaj, sa i përket marrëdhënieve Kosovë – SHBA, Blinken në reagimin e tij është shprehur se veprimet e së premtes do të kenë pasoja në marrëdhëniet midis dy vendeve, derisa ka thënë se janë duke u minuar përpjekjet për normalizim.

“Këto veprime kanë përshkallëzuar në mënyrë të mprehtë dhe të panevojshme tensionet, duke minuar përpjekjet tona për të ndihmuar në normalizimin e marrëdhënieve ndërmjet Kosovës dhe Serbisë dhe do të ketë pasoja për marrëdhëniet tona dypalëshe me Kosovën.”. tha Blinken.

Por, i mbetur pa opsion u deklarua të shtunën Kurti. Ai në një reagim në Facebook është shprehur se nuk kishte mundësi tjetër për veriun edhe pse sipas tij i kupton shqetësimet e ndërkombëtarëve.

“Pas betimit të tyre të enjten, dje, tre kryetarët e zgjedhur në zgjedhjet e 23 prillit në katër komunat në veri të Kosovës, e kanë pasur ditën e parë të punës. Shkuarja e kryetarit të komunës në vendin e tij të punës do duhej të ishte gjëja më normale e mundshme. Objekti i ndërtesës së komunës është vendi ku u shërbehet qytetarëve mbi bazën e ligjit e kushtetutës. Ai i takon Republikës prandaj edhe nuk është marrë dje e nuk do të merret asnjë ditë tjetër.”, ka shkruar Kurti.

“Ne jemi të vetëdijshëm dhe i kuptojmë shqetësimet e ngritura nga partnerët tanë ndërkombëtarë. Por, çdo opsion tjetër, do të ishte mos përmbushje e obligimeve kushtetuese të Qeverisë sonë ndaj kryetarëve të rinj; do të ishte mos përmbushje e obligimeve dhe detyrimeve të kryetarëve të rinj ndaj qytetarëve të Republikës; dhe, do të pamundësonte ofrimin e shërbimeve bazike komunale për qytetarë.”, u shpreh i pari i ekzekutivit.

Shtetet e Bashkuara të Amerikës, përveç Blinkenit reaguan edhe në dy nivele të tjera. Ishte i pari ambasadori i SHBA-ve në Kosovë, Jeff Hovenier që i quajti “masa të dhunshme” veprimet e policisë në veri të Kosovës.

“Shtetet e Bashkuara dënojnë veprimet në vazhdim të autoriteteve kosovare për të hyrë në ndërtesat komunale në veri të Kosovës. Masat e sotme të dhunshme duhet të ndërpriten menjëherë”, thuhet në reagim.

E “provokim të qëllimshëm” dhe “hap të panevojshëm” veprimin e autoriteteve kosovare në veri të vendit e ka quajtur senatori amerikan Chris Murphy i cili para disa ditësh qëndroi për vizitë në Kosovë për çka ka thënë se nuk është njoftuar nga kryeministri i Kosovës, Albin Kurti për një plan të tillë.

“Në takimin tim të hënën në Prishtinë me kryeministrin Kurti, ai nuk përmendi ndonjë plan për qasje në ndërtesat komunale. Si mik i Kosovës jam zënë totalisht në befasi dhe duhet t’i japë fund këtij provokimi menjëherë”.

Më tej kësaj, Murphy ka thënë se komunat janë pjesë e Kosovës dhe brenda juridiksionit të shtetit, por në këtë moment, situata e tensionuar në veri është sipas tij provokim dhe hap i panevojshëm.

“Po, këto komuna janë pjesë e Kosovës dhe nën juridiksionin e Prishtinës. Këta zyrtarë kanë të drejtën e tyre legale teknike të kenë qasje në këto ndërtesa. Por, në këtë moment, me situatën e tensionuar në veri, është një provokim i qëllimshëm dhe hap i panevojshëm”, tha Murphy.